تقنيات جديدة في مجالات ال IT

موضوع مهم جدا للمناقشة

السلام عليكم
كل يوم تقريبا بتطلع تقنيات جديدة في مجالات ال IT وبتحل مشاكل كتير ما كنتش موجودة قبل كدة واحدثت ضجة جامدة جدا من اهمها مثلا
NEXT GENERATION FIREWALL
FLEX VPN
NEXT GENERATION ENCRYPTION
الحاجات دي بنعرف نستخدمها بس ليه احنا ما عملناش اي تقنيات ليه ما فيش ولا فايرول عربي واحد رغم انه فيه مئات من الفايرول من شركات اجنبية وكل يوم الشركات بتطور اكتر كل يوم في تقينات جديدة ليه ما فيش روتر عربي
ليه ما فيش الجورزم عربي ليه بنستخدم بس امتي هنكون منتجين مش مجرد مستهلكين فيه افكار موجودة اكيد عند ناس بس ازاي التطبيق ممكن في يوم نلاقي فايرول عربي منافس ال ASA او ال FORTIGATE
ازاي الحاجات دي بتتعمل وليه مش موجود عنها اي حاجة عن التقينات دي وازاي الشركات دي بتنتجها ما فيش ولا موضوع عربي او فكرة عربية عن الحااجات دي ليه
اتمني اننا نتناقش في الموضوع ده ولو حد عنده اي شي يضيفه مش مجرد حد يعمل لايك وبس

Abdo Mamdoh

 

نصائح بخصوص المجال

فيه كام كلمة كنت حابب اقولهم بخصوص المجال من الي شوفته في سوق العمل والي ناس كتير لاسف فهماها غلط
1-ما فيش حاجة اسمها ايه احسن مجال ولا انهي مجال بيكسب اكتر كلهم ممتعين جدا وكلهم بيكسبوا بس الحكاية مش بالمجال الحكاية مدي تميزك لو انت مميز في اي مجال في دول هيكون ليك مسكب كبير ان شاء الله المهم تميزك

2-الموضوع مش بكتر الشهادات ما تقول هلم شهادات كتير و و و ده كله مش هينفعك لازم تكون واخد شهادات في الحاجات الي هتنفعك والموضوع مش شهادات بس فيه عوامل تانية كتير

3-لازم لما تاخد كورس مش مجرد تحضر الكورس وتمتحن وتبقي انت كدة خلاص لازم تقرا كتير جدا وتنزل كتب وتقرا عن مجالك وتشوف فيديوهات لناس تانية وتتابع علي طول في المجال مش كورس واحد وانتهت القصة لا الموضوع اكبر من الكورس بكتير

4-بالنسبة لموضوع الانجليزي الانجليزي امر لا بد منه ومش رفاهية ده متطلب اساسي لان كل المراجع والكتب لاسف بالانجليزي وافضل حل جربته علشان مشكلة الانجليزي هي ال SUBTITLES يعني تبدء انك تفهم الكورس بالعربي بعد كدة تشوفه بالانجليزي وتشغل معاه SUBTITLES يعني والمحاضر بتكلم الكلام بيظهر دي طريقة كويسة جدا وهتخليك تحسنه بسرعة

5-ما فيش حاجة اسمها انا لسة طالب ولما اخلص هشوف كورساتي لازم في مجالنا ده من وانت طالب تشوف كورسات وتنزل في شركات تدريب علشان تتعلم عملي كتير لان في الكلية لاسف مش هتتعلم حاجة ده لو ما اتعلمتش غلط

6-الشغل مش بالتقدير الشغل بمدي معرفتك وخبرتك وبتعرف تعمل ايه

7-سيبك من الكلام بتاع معتمد من الاتحاد الاوربي والحق معتمد من بوركينا فاسو والكلام ده الاعتماد الحقيقي بيبقي عن طريق امتحان اون لاين بتمتحنه من الشركة الام بعدها بتجيلك شهادة دولية

8-منحة ال ITI كويسة جدا بس لو انت بتبدء تبني نفسك من الكلية هتكون سبقتهم بكتير ومش هتحتجها

9-لو جالك انك تشتغل في مكان ببلاش حتي روح واستفيد كل دي خبرة هتفيدك بعد كدة وكفاية الناس الي هتعرفها

10-العلم ما لوش سن خصوصا في مجالنا ده فاوعي تستقل بحد علشان سنه

11-بلاش الكلية تحدد مجالك يعني مش علشان لقيت البرمجة وحشة في الكلية يبقي هي وحشة الكلية والعك ده حاجة والشغل الحقيقي حاجة تانية خالص

12-دايما ساعد الناس وما تبخلش حتي لو ما حدش ساعدك عن نفسي في اول الطريق لاسف ما لقتش حد يدلني عن الطريق وضيعت وقت كتير فانت ساعد الناس علشان ربنا يساعدك

13-ابحث دايما بنفسك اتعلم مهارات البحث في جوجل وتورنت

14 اتعلم ازاي تستغل السويشيل ميديا ازاي تستغل الفيس بوك صح ازاي تستخدم التويتر صح ازاي تعمل بروفيل علي LINKIDIN وتنمي مهارتك عليه وتوصله لناس كتير

15-لو عندك بروجكت عاملها شوف المواقع الي بتترفع عليها زي GITHUB هتفيدك جدا وهتخليك تنشر افكارك ومشاريعك وتتعرف اكتر

16-اوعي تيئس (كانت المفروض اول حاجة اكتبها )

‫#‏نصايح‬

Abdo Mamdoh

 

محاضرة من MIT

كنت بتفرج علي محاضرة من MIT عن السيكورتي لفت نظري عدت ملاحظات
اولا من ناحية معاملة الطلاب

1-الدكتور طول المحاضرة مبتسم حتي وهو بيشرح لا مضايق ولا مكشر ولا وشه عليه غضب ربنا ولا جاي يطلع العقد بتاعته علي الطلبة

2-الدكتور في طلاب دخلوا بعده ب 10 دقايق او ربع ساعة وما اتكلمش ولا اعترض ولا كشر حتي

3-قبل ما يبدء بالشرح قال اي واحد مش فاهم اي حاجة او مش واضحة يقدر يرفع ايده ويسئلني

4-اي حد كان بيسئل سوال كان بيقوله سوال كويس جدا ويتناقش معاه وبعد ما يخلص الاجاية يقوله فهمت ولا لا

بالنسبة بقي للشرح

1-رغم اني مش قوي جدا في الانجليزي فهمت والدنيا كانت واضحة رغم ان الموضوع كان في حاجات كتير اول مرة اسمعها وادرسها

2-الشرح كان فيه حرافية عالية جدا وكان ممتع ومفيد

3-لما جيه يشرح قال المصادر الي ممكن تذاكر منها والي هو اعتمد عليها في التحضير مش داخل بالبركة مش عارف لسة هيشرح ايه الا جوا المحاضرة

4-قال ان هيبقي فيه مصادر علي الموقع الخاص بالكورس لو حد شايف من “الطلبة” ان فيه مصادر احسن او عنده اي تعليق علي الشرح او المصدر او حابب يتناقش او يشرح موضوع هكون سعيد جدا واحب اني اتناقش معاه واسمعه رغم معني ان بيدرس في ال MIT انه من افضل دكاترة العالم

5-لما جيه يدي الحاجات الي مطلوبة من الطلبة انها تعملها كانت كلها حاجات عملية يعني قال ان لكل طالب هيكون ليه حساب عن بعد لسيرفر والسيرفر ده فيه مشكلة معينة او ثغرة معينة ومطلوب من كل طالب انه يكتشفها ويحلها ومش بس كدة كل طالب مختلف عن التاني مش شغل كلام نظري وبننقله قبل المحاضرة بنص ساعة

6-قال في بعض الحاجات الموجودة في الابات ممكن اول مرة طلبة تشوفها تحاول تبحث وهيكون فيه محاضرات زيادة ومصادر تراجعوا منها كنوع من تقوية المعلومات والبحث

دي شوية حاجات لاحظتها ومش كل حاجة

Abdo Mamdoh

 

حابب تشتغل في مجال ال IT

لو انت طالب في كلية حاسبات او هندسة او اي كلية عموما وحابب تشتغل في مجال ال IT
قدامك تحدي كبير في الاف كل سنة بيتخرجوا من الكليات ده غير الي حاببين المجال فبالتالي لازم انك تزود فرصتك في العمل في المجال ده عن غيرك لانه فيه الاف منافسين ليك وتبدء تحضر نفسك
1-اولا من الناحية العملية لازم من وانت طالب ولو انت في ثانوي حتي لسة انك تبدء تظبط نفسك تشوف كورسات عن كل مجال وتشوف حابب ايه وتبدء تشتغل فيه وتذاكره او تاخده كورس وتتمرن عملي كتير جدا ولو في الصيف تحاول تتدرب في شركة ولو حتي ببلاش المهم تستفيد الخبرة

2-ثانيا حاليا بقي مطلب اساسي في اي شركة او اي شغل لغة تانية لازم تحاول تظبط لغة تانية بجانب لغتك وهي اللغة الانجليزي طبعا وممكن تتعلمها اونلاين من مواقع كتير مش لازم كورس فيها وحاول تشوف فيديوهات انجليزي كتير في مجالك منها تتعلم اللغة ومنها تتعلم مجالك

3-ثالثا مهارات الاتصال والتواصل لازم تكون شخص مرح “مش رخم “ ده بيفيدك جدا في مجال شغلك انك تتعامل مع الناس وتكون علاقات لان من اهم الحاجات في مجالنا هي العلاقات لازم تكون انسان مرح وخدوم علشان تعمل علاقات قوية

4-رابعا التسويق لنفسك ودي من اهم الحاجات لازم تعمل CV كويس لو عندك بروجكت ممكن ترفع علي مواقع زي GIT HUB وتخلي الناس تقيمك والشركات تشوفه تعملي اكونت علي LINKEDIN وده شبكة اجتماعية فيها كبار الشركات في العالم تقدر تعرض عليه ال CV
بتاعك ويجيلك منه فرص شغل كتير

Abdo Mamdoh

 

عن مجال السيكورتي

بالنسبة للناس الي سئلتني عن مجال السيكورتي
لو فاكر ان مجال السيكورتي كورسين هتاخدهم وتشتغل بيهم وخلصت علي كدة او لو فاكر ان مجال السيكورتي ده بوابتك للفلوس من غير تعب او مجهود او لو فاكر انك هتبقي زي الهكر بتوع هولويد وتكتب اوامر باللون الاخضر وتظهر ليك حاجات عجيبة كدة يبقي احسن ليك انك ترجع وما تتدخلش المجال ده واحب اوضح كذا نقطة مفهومين غلط عن السيكورتي

1-الهكر مش حرامي زي ما الناس فاكرة الهكر منه كذا نوع من ضمنه الحرامي ومن ضمنهم الي بتستخدمه الشركات والمواقع علشان يحمي انظمتها ويكتشف الثغرات فيها

2-الهكر ما بيسرقش اكونتات الفيس بوك والكلام العبيط ده السيكورتي والهاكينج اكبر من كدة بكتير بتتكلم عن انظمة موسسات كبيرة وانظمة مواقع

3-الهكر بتوع افلام هوليود الي بيكتبوا في شاشة خضرا والكلام الهجس ده مش حقيقة الاختراق مش بالسهولة دي خالص وما فيش حاجات بتتعمل كدة

4-علم السيكورتي والهاكينج علشان تتمكن منهم بتدرس حاجات كتير جدا زي الشبكات والويب واحيانا بتوصل انك تدرس الكترونيات وانظمة صناعية وميكانيكا لو تخصص في اختراق الانظمة الصناعية ولازم يكون عندك فكرة عن حاجات كتير جدا

5-السيكورتي والهاكينج كل يوم فيهم جديد تقريبا فلازم تقعد تقرا علي طول والدراسة فيها مدي الحياة يعني ما ينفعش توقف او تكسل لان كل يوم فيه جديد ولو ما وكبتش التقنية الجديدة طبعا سوقك هيوقف ومعلوماتك كلها هتقدم

6-لازم تتقن اللغة الانجليزية كويس جدا لان اغلب المراجع والكتب كلها اجنبي ما فيش مصادر عربي خالص تقريبا فلازم تتعود علي القراءة بالانجليزي والاستماع بالانجليزي

7-فيه جزء في السيكورتي بيتعلق بخورزاميات التشفير وهو علم التعمية وده من اصعب وامتع العلوم اليم مكن تقابلها في حياتك والعلم ده بيحتاج نوع من الرياضيات اسمه الرياضيات المتقطعة + خبرة برمجية واغلب الي بيدرسوه بيكونوا في الماستر بتاع الجامعات وتعتبر الجامعة الرائدة فيه في العالم هي MIT

8-شغل السيكورتي مربح جدا وممتع بس مش بسهولة لازم تتميز في مجالك وتقرا كتير جدا ويكون عندك معرفة بحاجات كتير

9-مش هتفضل طول عمرك تشتغل شغل تكنيكل هيجي عليك الوقت وتبدء في الشغل الاداري ووضع الخطط الخاصة بامن الموسسة وده لازم خبرة عملية كبيرة الاول والي غالبا بيطلق عليهم CISO

10-السيكورتي ممتع جدا وفيه فن وتفكير كتير وبيديك مساحة لابداع كبيرة عن نفسي اراه امتع مجال في ال IT ومش صعب ولكنه محتاج تركيز ومجهود وابداع

11- عن تجربة السيكورتي اسلوب حياة وتنظيم وبيخليك تنظم حياتك وتفكر بفكر جديد وهيعلمك حاجات كتير جدا في حياتك مش بس في التكنلوجيا لا في اسلوب حياتك كله