دردشة مع مدراء أقسام الآي تي IT Manager

دردشة مع مدراء أقسام الآي تي IT Manager
سلسلة الدردشة 1
==========================
إذا كنت تعمل في مجال الآي تي فأنصحك بأن تقرأ تلك المقالة، وخصوصاً أنك بتحلم أكيد أن تكون في يوم من الأيام مدير لأحد أقسام الآي تي، أما إذا كنت بالفعل مدير من مدراء الآي تي فلا تقول الوقت فات! بل إقرأ تلك المقالة وإبدأ بتنفيذ ما فيها من الآن…

أولاً: البدايات تحدد النهايات
===============
البداية القوية أكبر دليل على نجاحك كمدير في الآي تي، واحد يقولي طيب إزاي أبدأ بداية قوية؟ أقولك أنا بص يا سيدي

1- قم بطلب جرد من الإدارة المالية لقسم الآي تي، والجرد هيكون فيه كل الأجهزة الهاردوير، زي مثلاً عندك كام سيرفر كام سويتش كام طابعة كام جهاز كمبيوتر وأماكنهم ومين اللي مستلمهم ووو وكذلك هيكون في الجرد البرامج اللي إشترتها الشركة ولها ترخيص، كل الحاجات دية تعرف عندهم بالأصول الثابتة، ممكن يكون في الجرد معلومات أخرى زي المكاتب والكراسي ووو حاجات كده عموماً هقولك ليه طلبت الجرد وهتستفيد منه إزاي بس خليك معايا… تنبيه بعض الشركات ممكن مش تلاقي عندهم جرد لقسم الآي تي مثلاً في الحالة دية هتعمل إيه؟ بسيطة إطلب من الإدارة المالية عندك يعملوه من غير الخوض في أي من الأصول الثابتة الغير متعلقة بعملكم مع تنبيه الإدارة العليا بالشركة لمثل هذا…

2- قم بطلب جرد للخدمات اللي قسمك بيقدمها للمستخدمين وللشركة، إطلبه من رؤساء الأقسام إذا كنت مدير لكل أقسام الآي تي أو من موظفين القسم إذا كنت هتبقى مدير لأحد أقسام الآي تي، وللتبسيط تخيل نفسك شركة خارجية وبتقدم خدمة لشركتك، يعني مزود خدمة كويس إيه بقى الخدمات دية اللي إنت بتقدمها لهم؟ مثلاً إيملات أو سيرفر ملفات أو حتى صيانة كمبيوترات أكتب كل الخدمات اللي بتقدمها لهم وياريت بشيء بسيط من التفصيل…

3- أطلب سيرة ذاتية محدثة لكل الموظفين اللي معاك، ركز معاك مش عندك هاه… وده مش معناه أنك هتستغني عنهم، لازم توضح لهم النقطة دية في أول إجتماع معهم، وده هنوضحه في جزئية الإجتماع الأول والإجتماعات الدورية في الأجزاء التالية من المقال تابع القراءة بس…

4- أطلب من كل موظف في القسم أن يكتب مهامه اليومية والدورية في ورقة واحدة وبالعربية (طبعاً إذا كان عربي أما إذا كان غير كده فباللغة الإنجليزية)، يعني بإختصار بيعمل إيه وصف لوظيفته، ونبه عليهم محدش يكتب أكثر من اللي بيعمله لأنه هيتحاسب عليه إذا حصل فيه مشكلة في المستقبل، كمان محدش يقلل مسئولياته علشان ده ممكن يخليك تستغنى عن خدماته…

5- أطلب من كل موظف في القسم أن يكتب مشاكل العمل ومشاكله واللي مش عاجبه في الشركة في ورقة واحدة، وهذه ترسل لك على إيميلك الخاص، وقول لهم إنك لن تسمح لأحد بالإطلاع على تلك الأوراق علشان الناس تكتب براحتها وكل واحد يكتب اللي جواه حتى لو كانت ملاحظات على مدير القسم اللي هوه فيه، لكن حذرهم من النقد الشخصي خلي النقد عملي ولا يمس الجوانب الشخصية أبداً… هديكم مثال مثلاً موظف يقول مديري ظلمني ومشيلني كل الشغل وفلان فاضي مش بيعمل حاجة! طيب ليه نقبل التفسير ده لما ممكن نقول إنك شخص يعتمد عليه ومديرك يثق في شغلك أكثر من غيرك وبالتالي يوكل إليك معظم المهام! لذلك بلاش الدخول في ضمائر الناس وخبايا نفوسهم وخلي نقدك لتوزيع المهام من الأشخاص واضح كويس…

أمهل الجميع ثلاثة أيام ليأتوك بتلك الطلبات الخمسة، ولو فيه حد إتأخر يبقى إنطباع سيئ عنه قول لهم كده في الإجتماع الأول عندما تطالبهم بتلك الطلبات، واحد يقولي بس إيه اللي هستفادوا من كل ده؟ بقى ده سؤال يا راجل إنت كده وبالربط بين كل تلك الأشياء قدرت تفهم الدنيا في ثلاثة أيام بل وهتلاقي المشاكل اللي في القسم وهتركز عليها، واللي بعضها يمكن يكون مستعصي وباللي جمعته ده يمكن تلاقي حلها بين السطور في تلك الأوراق، عموماً أنا عايزك تذاكر الأوراق دية عارف يعني إيه تذاكرها ومش بس كده لأ تربط بينها إعمل علاقات بين كل تلك الأوراق، يعني مثلاً الموظف س بيشتغل على السيرفر الفلاني وبيقدم الخدمة الفلانية مع إنه مش مؤهل كفاية وفيه الموظف ص أحسن منه بس ليه مش واخد فرصته ومع ذلك س بيشتكي ومهامه مش واضحه فضلاً عن أن يقوم بها ووووو ذاكر الدنيا دية كويس وبعدها هتطلب إجتماعك الثاني بالناس وصدقني حتى إنت مش هتصدق النتيجة اللي هتوصلها بعد الخطوة دية، الناس نفسها هتحس إنك كأنك معاهم من سنين، صدقني حتى لو بقالك سنين في نفس الشركة وتم ترقيتك لتكون مدير للآي تي ومهما ظنيت نفسك حافظ الشركة هتلاقي أمور كثيرة إتضحت ليك بعضها لم تكن لتتخيله، حتى إنك هتبدأ تفسر بعض الأحداث اللي مش كنت شايف لها أسباب مقنعة، مثلاً فيه مشاكل كثيرة في سيرفر الإيميلات هتلاقي الشخص اللي مسئول عن تلك الخدمة غير مؤهل بشكل كاف! أو إن السيرفرات قديمة جداً ومحتاجة تتغير أو على الأقل تتحدث، وغيرها كثير دية فقط أمثلة بسيطة للتبسيط والتوضيح، والآن وصلنا لموضوع الإجتماعات هكلمكم عنه الآن عارف صبرك نفذ ههههه…

ثانياً: الإجتماعات
==========
الإجتماع الأول مع موظفي القسم:::

الهدف منه عدة أمور:

1- التعرف على الموظفين والموظفين يعرفوك، تعارف يعني…

2- توضيح بعض المبادئ العامة واللي لا تسمح بكسرها زي مثلا: أن أكبر عيب عندك في الموظف هو إنعدام الأخلاق: فمثلاً لا تقبل الشخص البذئ حتى ولو بالهزار، كمان لا تحب الغيبة والنميمة والتكلم في حق الغير، أخطر العيوب الخلقية كتم العلم والمعلومات والإحتفاظ بها مهما كانت الدوافع مثل هذا الشخص يحتاج لتكسير عظام، وأن الشغل مش بيتوقف على شخص صحيح ممكن نقابل شوية صعوبات لكن في النهاية الدنيا هتمشي من غيره، فهمهم إنك هتعمل مبدأ الدوران في الأدوار والمهام كل ستة أشهر يعني محدش هيبقى في مكانه واللي مش هيعلم الناس هيقوم بالمهمتين معاً القديمة والجديدة…

3- طلب الطلبات الخمسة السابقة منهم وشرحها وتوضيحها والتأكد من أن الكل وصلته الرسالة وإنه يجهزها خلال ثلاثة أيام…

4- قول لهم إن التطوير للقسم والناس اللي فيه أولى أولياتك وأهم أهدافك وهنا لازم يظهر الإبداع، يعني مثلاً الشركة لا توفر كورسات لتطوير الموظفين هتعمل إيه؟ تقسم البلد نصفين ههههه يعني إيه نتجمع ساعة بدري وناخد ساعة من أول بداية وقت الشغل ونعمل كورس ساعتين يومياً، الكورسات دية ممكن تخليها مرحلتين كورسات عبارة عن ورش عمل يشرح فيها كل موظف إزاي بيأدي عمله ينقل لنا خبرته، والمرحلة الثانية مرحلة تطويرية، ممكن كمان تقسم الناس كل في الحتة بتاعته مش تجمع كل الناس في كورس واحد وتضيع وقتهم، كمان ممكن تعمل لوحة تحفيزية وأفكار إبداعية، كمان أعمل مسابقة لأكثر موظف محبوب في القسم وعلق اسمه على لوحة الشرف وإصرف له حافز مادي من الشركة، ولو الناس إختارتك أعمل عزومة للناس بالحافز المادي ده، بصوا يا شباب ناس كثيرة بتقول كان نفسها تشتغل في جوجل أو مايكروسوفت أوووو الشركات دية بقت كده بالناس المبدعة اللي فيها، فمثلاً ما إحنا ممكن نخلي بيئة العمل بتاعتنا أحسن منهم يعني مثلاً نعمل جمعية زي ما المصريين بيسموها أو قَطَه زي إخونا السعوديين ما بيسموها يعني نجمع مبلغ مادي من كل الموظفين كل شهر ونشتري ثلاجة ونجيب شاي وقهوة وعصاير وفاكهة وفطار سندوتشات طعمية أهم حاجة ههههه وهكذا…

5- حفز الناس وعلي همتهم وقول لهم إنك ظهر لهم ولن تسمح لأي حد بأن يتجاوز الحدود مع أهم قسم في الشركة قول لهم إننا هنكون قسم مسيطر ههههه وسنساهم بأفكارنا وإبداعاتنا في نهضة الشركة ووو قول لهم أنا عايزكم تحبوا عملكم وتخصصكم لا أن تحبوا الشركة عايزكم بعد خمس سنين تلاقوا إن الشركة أصبحت دون مستواكم ومش هتقدر تدفع لكم مرتباتكم عايزكم تنتقلوا لشركات أخرى وتنقلوا التجربة بتاعتكم دية وتساهموا في نهضة أقسام الآي تي على مستوى دولتكم والوطن العربي والإسلامي كله…

طبعاً فيه إجتماع أول مع الإدارة العليا للشركة هتوضح فيه خطة عملك واللي هنشرحها في ثالثاً من هذا المقال، وفيه إجتماعات دورية إسبوعية مع مدراء الأقسام وشهرية مع الموظفين لمتابعة سير العمل، وده كله إنته اللي بتحدده تبعاً لسير العمل يعني فيه إجتماعات إستثنائية لظروف طارئة المهم إشتغل بمبدأ تظبيط الشغل عن طريق الإجتماعات قبل تنفيذ الشغل نفسه، وأوعاك بعد فترة لما تلاقي الدنيا بقت ماشية لوحدها تكسل أو تبطل تفكر في إبداعات جديدة أوعاك أوعاك أوعاك، وعندما تشعر أنه لم يعد هناك ما تقدمه فإبحث عن عمل… كمان من الحاجات المهمة لازم كل يوم تمر على الناس كلها مرتين مرة الصبح ومرة بعد الظهر سلم عليهم دردش معاهم أقعد معاهم ساعدهم وفكر معاهم ووو مش تقعد في مكتبك ليل ونهار وسايب الدنيا تضرب تقلب ههههه…

ثالثاً: خطة العمل
==========
ودية الحقيقة محتاجة لمقالات لأنها علم نعم علم يجب أن يتعلم لكن على العموم سأشير لك على بعض أهم تلك الأمور…

الخطة التشغيلية والخطة الإستراتيجية: كان لي مقاله قديمة عن هذا الموضوع في الرابط المرفق مع المقالة، فإقرأها حاول بس تفرق أن التشغيلية مع الموظفين والإستراتيجية مع الإدارة العليا للشركة، التشغيلية سنة والإستراتيجية خمس سنين، إسيبكم أحسن مع الرابط…

التوثيق والتوثيق ثم التوثيق: من أهم الأشياء أن لازم يكون عندك ملفات فيها معلومات تفصيلية عن كل صغيرة وكبيرة في القسم وموثقة ومحدثة، أوعى تتسأل من حد وتقول مش عارف أو تقريباً، وأوعى تسأل حد من موظفي القسم ويقولك مش عارف أو تقريباً، هذا لا يمكن التسامح فيه أو نسيانه…

التطوير للقسم: هاردوير – برامج – موظفين… أولى أولوياتك…

معلش طولت عليكم بس المقالة دية ما هي إلا بعض النصائح والخطوط العريضة وبعضها قد لا ينطبق على شركتك أو حالتك فحاول تفصلها على حالتك حتى تستفيد منها أقصى إستفادة

المهندس عادل الحميدي

http://www.networkset.net/2013/02/%D9%88%D8%B6%D8%B9-%D8%A7%D9%84%D8%AE%D8%B7%D8%A9-%D8%A7%D9%84%D8%AA%D8%B4%D8%BA%D9%8A%D9%84%D9%8A%D8%A9-%D9%84%D8%A5%D8%AF%D8%A7%D8%B1%D8%A9-%D8%A3%D9%82%D8%B3%D8%A7%D9%85-%D8%A7%D9%84%D9%80-it/

 

فوقوا بقى

السلام عليكم

نصيحة عامة وهامة لأن فيه ناس فاهمه الدنيا غلط…

رأس مال مهندس الشبكات ليس فقط شهاداته، رأس ماله أمانته وصدقه وأخلاقه –> سمعته يا ناس… ثم شهاداته

قال تعالى: {إِنَّ خَيْرَ مَنِ اسْتَأْجَرْتَ الْقَوِيُّ الْأَمِينُ}

إستقيموا يرحمكم الله

‎المهندس عادل الحميدي‎

 

قوة الحشد الجماهيري

السلام عليكم ورحمة الله وبركاته

بدون مقدمات عايز أشير النهاردة وأنبه على أن موازين القوى في العالم الآن تغيرت إلى قوة لم يكن ينتبه لها أحد مطلقاً وخصوصاً بعد ظهور الشبكات الإجتماعية ألا وهي قوة الحشد الجماهيري!!!

واحد يقولي إيه الكلام الكبير ده يا باشمهندس عادل وعايز توصل لإيه؟
سأعطيكم مثالاً لما أرمي إليه…

نحن هنا في الجروب أكثر من 31 ألف مشترك مهتمين بالآي تي صح؟ تمام

هل تعتقد أنه بإمكاننا أن نقوم بحملة ونحن بهذا العدد لتغيير أي واقع سيء نعيشه كمتخصصين في مجال الآي تي؟ واحد يقولي إزاي؟ وواقع سيء زي إيه؟

XXX السلبيين أصحاب مش هنقدر ومش ممكن ووو يمتنعوا من المشاركة XXX

خليني أضرب لكم المثال التالي والذي يشغل تفكيري كثيراً…

فيه حاجات كثيرة مش كويسة في مجالنا وتعيق تقدمنا فيه ومشاركتنا في تطوره، زي مثلاً إن الشركات الكبيرة متجاهلة الملايين من المتخصصين الناطقين باللغة العربية وعمرها ما فكرت تعمل مناهج وكتب أو إمتحانات باللغة العربية (هناك إستثناءات لا تذكر) فضلاً عن برامج متخصصة لتساعدنا في إنجاز مهامنا الوظيفية باللغة العربية! مع إن العرب أحد الأسواق الكبيرة لتسويق منتجاتهم! كما أن هناك أمثلة للغات أقل من العربية ومع ذلك أعطوها أهتمام كبير! والأسباب لذلك كثيرة وأعتقد أنها معروفه ضمنياً ونعيشها على كافة المستويات ومش حابب صراحة أخوض فيها حتى لا تضيع الجهود ونتشتت عن الهدف بطرح نظرية المؤامرة لأني أعتقد أن التقصير منا في إضاعة حقوقنا!!!

الشاهد من كل ما سبق أني أريد طرح فكرة إنشاء حملة نضغط فيها على شركة مثل سيسكو لطرح مناهج متكاملة لجميع المستويات والشهادات وإمتحاناتها باللغة العربية…

طبعاً التخطيط والآليات ووسائل التصعيد ووو كل ده الكلام فيه سابق لأوانه، ما أردته هنا أن أسمع منكم رأيكم لأني أعتقد أن العيار اللي ما يصيب يدوش ويكفينا شرف المحاولة وسينبه الشركات لمثل هذه الأمور في المستقبل القريب…

المهندس عادل الحميدي

 

NX-OS

السلام عليكم

النهاردة حابب أشوقكم أكثر لكورسات الداتا سنتر واللي لها علاقة وثيقة بتقنية السحابة Cloud وأقولكم إن فيه ناس بتخوفكم من أن السويتشات في الداتا سنتر لها نظام تشغيل جديد إسمه NX-OS وبالتالي لها إعدادات مختلفة وأوامر مختلفة وده صحيح لكن الأمر في غاية البساطة على أي حد تعامل مع أنظمة التشغيل IOS وخليني أضرب لكم مجموعة من الأمثلة بسيطة توضح الأمر فأذكر لكم أوامر كنتم متعودين عليها وشوف شكلها بقى إزاي في السويتشات الخاصة بالداتا سنتر واللي بيسموها Nexus Switches يلا نبدأ:

1- علشان أتنقل من النمط Privilege Mode إلى النمط Configuration Mode كنت بعمل إيه؟

Switch# config t

صح كده؟؟ تمام لكن الآن كل التغيير اللي حصل إنك ممكن تتنقل بكتابة كلمة Config بس شفتم الصعوبة بقى ههههه قال يقولك صعبة قال الناس دية بتهزر مش عارفة إننا إمكانيات وجبارة كمان ههههه يعني هتكتب

Switch-NX-OS-2K# config

2- طبعاً كلنا عارفين أوامر العرض show في أجهزة سيسكو بشكل عام وفي السويتشات بشكل خاص وأنها مفيدة جداً صح؟ وكنا بنكتبها في أي نمط طيب Mode ؟؟ صح تمام في نمط الإمتيازات Privilege Mode، وكنا لما نحب نكتب أحد أوامر العرض show وإحنا في أي نمط Mode آخر غير نمط الإمتيازات ده كنا بنعمل إيه ؟؟؟ صح ممتاز ما شاء الله عليكم كنا بنكتب كلمة do قبل أمر العرض يعني مثلاً

Switch# show run
Switch(config)# do show run

كويس كده، دلوقتي بقى يا سيدي وفي السويتشات النكسيس NX-OS ممكن تكتب أوامر العرض Show في أي نمط Mode من غير ما تحتاج تسبق الأمر بكلمة do !!! مثلاً

Switch-NX-OS-5K# show run
Switch-NX-OS-5K(config)# show run
Switch-NX-OS-5K(config-if)# show run

3- كمان لما كنا بنحب نطبق مجموعة من الإعدادات أو الأوامر على مجموعة من المنافذ Ports مرة واحدة كنا بنعمل إيه؟ كنا بنكتب الأمر ده مثلاً صح ؟؟

Switch(config)# interface range fa0/0 – 5

دلوقتي بقى يا سيدي وفي السويتشات النكسيس NX-OS ممكن تكتب الأمر بالشكل ده من غير كلمة range خالص ههههه لاحظ كمان ومن غير مسافات

Switch-NX-OS-7K(config)# interface fa0/0-5

4- آخر مثال وخليني أديكم مثال نظري أكثر منه عملي شوية:: علشان كده حابب أضربه لكم في الـ Vlan Trunking Protocol (VTP) ::: كلنا عارفين إن VTP له ثلاثة أنماط يعمل بها السويتش Server, Client, and Transparent لكن في السنوات الأخيرة بدأت تقل شعبية هذا البروتوكول لأنه كان بيستهلك الـ Bandwidth كمان في نقاط ضعف أمنية المهم الشركات بدأت تستغنى عنه وتخلي الشبكات بتاعتها تعمل بدونه طيب إزاي إذا كان السويتش بيجي Server by default ؟؟ سهلة عن طريق جعل كل السويتشات في الـ Transparent Mode كويس كده ؟؟؟ لا طبعاً مش كويس لأن الـ VTP لسه شغال صحيح قل إستهلاكه للـ Bandwidth بس لسه شغال ونفس مشاكله الأمنية Security طيب والحل إيه ؟؟؟؟ الحل عند السويتشات الجديدة النكسيس بتاعة الداتا سنتر إزاي ؟ واحد يقولي ممكن نخلي السويتش لا يدعم الـ VTP خاااااالص أقوله ممكن لكن ده هيكون في المستقبل لسه شوية لأن بعض الشركات مازالت تعتمد عليه في شبكاتها لكن الحل الأجمل واللي عملته سيسكو هو OFF Mode ههههه نعم مود جديد للـ VTP إسمه كده OFF
يلا كفاية عليكم كده النهاردة أرجو أن تكون الصورة وصلت وإن الدنيا سهلة ومفيهاش صعوبة كل اللي تحتاجوه بس تقرأوا وتقرأوا ثم تطبقوا ما تعلمتوه

أخيراً أكيد ملاحظين في أسماء السويتشات نكسيس 2K, 5K, and 7K ودية الموديلات المختلفة للسوتشات أقرأوا عنها بقى ههههه

تحياتي ولا تنسوني من دعوة بظهر الغيب

أخوكم المهندس/ عادل الحميدي

 

علو الهمة

 

إن لي نفساً تواقة!!!

قال رجاء بن حيوة: كنت مع عمر بن عبد العزيز لما كان واليا على المدينة فأرسلني لأشتري له ثوبا، فإشتريته له بخمسمائة درهم، فلما نظر فيه قال: هو جيد لولا أنه رخيص الثمن.

فلما صار خليفة للمسلمين بعثي لأشتري له ثوبا، فإشتريته له بخمسة دراهم، فلما نظر فيه قال: هو جيد لولا أنه غالي الثمن.

قال رجاء: فلما سمعت كلامه بكيت، فقال لي عمر: ما يبكيك يا رجاء؟

قلت: تذكرت ثوبك قبل سنوات وما قلت عنه، فكشف عمر لرجاء ابن حيوة سر هذا الموقف، وقال: يا رجاء إنّ لي نفسا تواقة، وما حققت شيئا إلا تاقت لما هو أعلى منه…

تاقت نفسي إلى الزواج من ابنة عمي فاطمة بنت عبد الملك بن مروان خليفة المسلمين فتزوجتها!

ثم تاقت نفسي إلى الإمارة فوليتها على مدينة رسول الله (صلى الله عليه وسلم)!
ثم تاقت نفسي إلى الخلافة فنلتها!

قلت: والآن يا خليفة المسلمين؟

قال: والآن يا رجاء تاقت نفسي الى الجنة، فأرجو أن أكون من أهلها!!!

فأين من تاقت أنفسهم إلى الجنة؟

يارب يارب يارب يارب إجعلنا منهم آمين آمين آمين آمين…

 

قصة نجاحك!؟ تنجح أو تموت!؟

قصة نجاحك!؟ تنجح أو تموت!؟
سلسلة الدردشة 2
============

سلامو عليكو، أيوه نعم العنوان صح زي ما قرأته مش مكتوب غلط ولا حاجة، أنا النهاردة عايز أدردش معاك شوية حول قصة نجاحك، نعم قصة نجاحك أنت أيوه أنت، مهما بقى كان وضعك الحالي زي سنك أو وضعك المادي أو مستواك العلمي في مجالك أو أو أو مهما كان وضعك الحالي، تعرف أنا قمت من على السرير من النوم بعد يوم عمل شاق وطويل بالإضافة لأني مريض لدرجة أني كنت في المستشفى، عارف ليه النوم طار من عيني وأنا في أمس الحاجة ليه، علشان أكلمك عن قصة نجاحك لأني بحبك جداً في الله، وأتمنى لك الخير كما أتمناه لنفسي والله على ما أقول شهيد، وزعلان قوي لأنك متوفر فيك كل صفات وإمكانيات النجاح وقادر إنك تنجح ولكنك لا تريد!

خليني أبدأ معاك من لحظة الألم! ناس كثيرة لما بتقرأ قصص نجاح لناس في التخصص زي اللي إشتغلوا في شركات عالمية وهم صغيرين في السن لأنهم أفذاذ والشركات شافت فيهم إن عندهم إضافة جديدة للعالم! أو اللي أنشئوا شركاتهم الصغيرة وبعدين الدنيا ضربت معاهم ونجحوا نجاح باهر فشركاتهم كبرت لأنهم شاطرين وقرأوا المستقبل صح وبالتالي مشيوا صح! على طول بعد قراءة قصص النجاح دية بيحصل للناس حاجتين: الأولى الحسرة والألم إنهم مش قدروا يبقوا زيهم، الثانية الأمل أنهم نفسهم يبقوا زيهم بس مش عارفين إزاي، والثانية دية بقى هي نقطة الإنطلاقة في دردشة النهاردة! الأمل…..

تخيل إن الموضوع بسيط، هي كلها ثلاث حاجات وخصلت! الأولى القراءة، الثانية التطبيق، الثالثة التسويق.

القراءة:
البداية من هنا من القراءة والقراءة ثم القراءة، وخلني أرتب لك الأحداث والخطوات في تلك النقطة، 1) حدد تخصصك اللي إنت ناوي تنجح فيه بإذن الله، بلا تراجع ولا إستسلام حتى تبدع فيه، مش كل يوم تمشي لك في تخصص مختلف حتى يضيع وقتك وعمرك هباءاً منثوراً، حدده وخلي بالك مفيش تغيير مش هنهزر العمر مش بعزأه، 2) شوف آخر التطورات وأحدث التقنيات والتوجهات من خلال متابعة أخبار مواقع الشركات الكبيرة في مجالك ومشاهدة حلقات TEDx،
3) إبدأ في القراءة ومن تحت الصفر مش من الصفر، فإبدأ بتأسيس نفسك صح في هذا التخصص من خلال قراءة كتاب يأسس لك ببساطة هذا الفن، لاحظ إني سميته فن لأنك ستهواه وستنام تحلم به، هتسجد لله وتسأله سبحانه أن يفهمك ويعلمك هذا الفن، وأن تنفع به الناس في كل مكان…..

خليني أقف هنا وقبل ما أكمل أعطيك مثال إيه رأيك؟ كويس هنفترض واحد قرأ عن علم التخزين Storage، واحد يقولي إيه هوه التخزين ده، إخوانا في اليمن شايفهم وقعين على نفسهم من الضحك، بس مش هقول ليه هم سيفهموني، المهم نرجع لموضوعنا التخزين! مع كبر حجم البيانات بالشكل الفظيع اللي بنشوفه اليوم، زي مثلاً موقع اليوتيوب متخيل الناس دية فين مخزنه كل الفديوهات دية، يعني الهارد بتاعهم سعته كام ههههه، علشان كده ظهر اليوم علم جديد إسمه Storage، فمثلاً كان أول جهاز كمبيوتر إشتريته أنا شخصياً وكان أيامها من ما يزيد على 15 سنة صيحة وحاجة محصلتش ههههه سعة الهارد ديسك بتاعه 60 جيجا! أما الآن فالفلاشات الصغيرة بهذا الحجم وزياده صح؟ طيب إزاي؟ أهو ده بقه نقطة من النقاط الساخنة في البحث الآن، واللي الشركات الآن بتتنافس فيه بشكل رهيب وغير عادي، سباق سباق بمعنى الكلمة، واحد يقولي بس إنت عرفت إزاي بقى من الأصل الموضوع ده، أقصد الـ Storage! من الأخبار كل يوم شركة تقول عملنا فلاش ميموري سعته كذا تقوم الشركة التانية ترد عليها، وكمان ظهرت مراكز البيانات Data Center أو تقنية السحابية Cloud وبدأت الناس تتكلم عن أن كل شيء هيكون مخزن على الإنترنت وجهازك لن يصبح إلا واجهة فقط للوصول لبياناتك، تخيل مثلاً إن الأوفيس زي برنامج الوورد هتفتحه من المتصفح زي ما بتفتح أي صفحة إنترنت وبمجرد ما تفتح الصفحة هيظهر لك شريط الأودوات وكل ما كان يظهر لك في البرنامج وبدون ما تحمله على جهازك! طيب الكم ده من البرامج هيكون متخزن فين؟! وكمان سمعت شوية حلقات من تيد بتتكلم في الموضوع ده، مش بس كده لأ كمان تخيل إن الموضوع ده تحته تفريعات كثيرة تمس كل التخصصات في الآي تي، واحد يقولي إزاي مش متخيل، أقولك مثلاً صناعة وسائل التخزين دية يدخل فيه مهندسين الكهرباء مثلاً ياترى الهاردوير هيكون شكله إيه؟ ومن أي مادة؟ وهيشتغل إزاي؟ طيب مع سعته الكبيرة دية هيحتاج لمعالج بروسيسور! ووو، كمان مهندسين الشبكات لأن الهاردات دية مش بس سعتها كبيرة لأ ده كمان عددها كبير فهل هتعمل بينها شبكة؟ تخيل إنه أيوه! حتى هيكون إسمها SAN أيوه زي ال LAN وهي إختصار كلمة Storage Area Network تخيل! وكمان المبرمجين علشان أنظمة التشغيل اللي هتشغل دنيا التخزين دية بما فيها، وحتى برامج إدارة تلك الهاردات… معلش المثال طويل بس علشان أوصل لك الصورة، طيب يبقى هنا أنت عملت حاجتين الأولى حددت تخصصك مثلاً وليكن السيرفرات أو الشبكات، بس إنت مش تقليدي إنت ناوي تنجح فعلشان كده حددت لك نقطة ساخنة وهتبدأ تتخصص فيها، وهي التخزين Storage الخطوة الثالثة بقى تقرأ كتاب عن أساسيات هذا العلم علشان تقدر بعدها تنطلق، طيب كتاب زي إيه؟ عارف فيه ناس الحماس إشتعل لديها ههههه حاضر يا سيدي هقولك، دائماً ما أنصح في مجالنا مجال تقنية المعلومات بشركة كومبتيا CompTIA وكتبها، نعم هذا ما أقصده كتاب Storage+، هات الكتاب ده وأحفظه زي إسمك، عيشه حبه خليه أعز صديق، وبعدين نأتي للخطوة التالية، واللي ترتيبها كام، تمام مركزين الخطوة الرابعة في أولاً القراءة

4) القراءة المتعمقة لمراجع أكبر، وكورسات أكبر الشركات في العالم، كمان خلينا نطبق على مثالنا يعني إبدأ وتدرج بقراءة كتاب آخر أو مرجع لكن مش للمبتدأين زي كتب CompTIA، لأ كتب أعلى مستوى ودية بسيطة جداً لما تقرأ كتاب Storage+ هتلاقي فيه مراجع الكتاب ده نقل منها أبقى أطلع عليها كده، وكمان دور على الأمازون واللي هية أكبر مكتبة إلكترونية في العالم، كمان من الكتاب الأول مش بس هتبني أساس عن هذا العلم لأ كمان هتطلع على أسماء شركات كبيرة في هذه الجزئية زي شركة EMC مثلاً في نفس مثالنا عن التخزين، وبالتالي هتبدأ تدور طالما هيه شركة رائدة في المجال يبقى أكيد لها كورسات، يبقى لازم تقرأ كتب الكورسات دية لازم، أوعى تقولي مش ينفع آخذ الكورس وخلاص، لازم أقرأ يعني، أقولك أيوه لازم ولا بديل عن القراءة!

5) قراءة الأبحاث العلمية في هذه النقطة بقى، الآن إنتقلت لنقطة حساسة وفي غاية الأهمية، أنت الآن ربما تكون لديك أفكار جديدة في هذا الفن أو التخصص من خلال فهمك المتعمق له، بس يا بطل ممكن الأفكار دية يكون فيه ناس سبقوك لها وقالوا إنها مش تنفع، أو بالفعل طبقوها وإنت لسه عايز تكتب فيها، شوف أيوه هي القصة سباااااق، حتى فيه كلمة مشهورة في مجال البحث العلمي إسمها تنشر أو تموت! وهي دية اللي إقتبست منها عنوان المقالة، المهم فلازم بقى تقرأ آخر ما توصل إليه البحث العلمي في النقطة دية، وتشوف الناس بتفكر إزاي طيب وده إزاي هعمله؟ برده بسيطة وبسيطة جداً، إقرأ موضوعي اللي في الرابط التالي وإنت تفهم

https://www.facebook.com/groups/AllCiscoLabs/permalink/614595518613244/
على فكرة بفضل الله تم تقييم مشاركتي في تلك المسابقة ضمن المائة الأوائل على مستوى العالم ولله الحمد والفضل والمنة.

ملاحظة: يجب مع التدرج طبعاً ومع الأيام أن لا يقل ما تقرأ عن 70 صفحة!

الآن قد إنتهينا بفضل الله من أولاً وهي القراءة والمخرجات منها مجموعة من الأبحاث العلمية والأفكار البحثية الرائعة، السؤال الملح هنا الكلام ده هياخد وقت قد إيه، طبعاً هي توفيق من ربنا سبحانه وتعالى في الأول وفي الآخر، لكن تقديري لها بثلاث سنوات، واحد يقول يا نهار! ثلاث سنوات! ليه هو أنا هخترع الذرة ههههه! وده مش هرد عليه وسيبك إنت بعد ثلاث سنوات توريه إختراعك، وفقك الله اللهم آمين،

التسويق:
واحد يقولي ليه بدأت بالتسويق إنت مش قلت التطبيق رقم 2 ثم التسويق رقم 3، ههههه تعجبني ومركز لكن خليني هنا أتكلم عنه قبل التطبيق ليه؟ لأن في ناس عند الإنتهاء من النقطة الأولى بتستعجل النتيجة، فتنتقل لجزئية تسويق الفكرة التي توصلت إليها، أو ساعات ربنا يكافئها سبحانه كريم، فحظها يبقى كويس وتشارك في مسابقة أو تشارك في مؤتمر علمي أو تنشر الفكرة في مجله علمية أو تراسل أحد الجهات المهم توصل فكرتها ومن هنا تبدأ حياة النجاح عندما تتبنى الفكرة أحد الجهات الكبيرة وتدعمها…

التطبيق:
فيه ناس بقى ربنا سبحانه وتعالى بيبقى راضي عنها أكثر، ومتعرفش تسوق الفكرة! واحد يقولي ههههه طيب ودول يبقى حظهم كويس وربنا راضي عنهم، ما هو إنت بتقول كده لأنك عايز تقطف الثمرة وهيه خضراء ولسه لم تنضج بعد، إقرأ قصة الناس صحاب الواتس آب WhatsApp وإنهم إترفضوا في مقابلات في شركات زي الفيس بوك، ولكن ماذا كانت النتيجة سنتين وسنتين بس طبقوا الفكرة، وباعوها لفيس بوك بمليارات! ياترى تحب أي نموذج من الإثنين تشتغل في فيس بوك وتاخد لك كام ألف ملطوش ههههه ولا تاخد لك مليارات! على العموم عايز أنبه هنا على نقطة في غاية الأهمية، النجاح وقته في غلم الغيب، وتوفيق من ربنا سبحانه وتعالى، إنت اللي يهمك أن تكون مرتاح الضمير، أكثر من مرة قلت لكم تخيلوا معي واحد نجح وحقق وبقى صاحب مليارات ولكن قصر في دينه حتى باظ وبدأ يترك الصلاة لأنه بقى غني وكده ومش عنده وقت، وبعدين يعيش له كام سنة، وينسى ربنا اللي هداه ووفقه، فيبدأ العقاب يمرض بالسرطان فيعيش معذب وبعدين يموت فيخلد في نار جهنم والعياذ بالله، الشاهد من المثال: يمكن تبوظ لو أصبحت صاحب مليارات فربنا سبحانه من رحمته بك وحبه لك، حفظك من ذلك وهتعيش فقير لكن أنت من أهل الجنة، والله عندها يبقى ربح البيع، كمان تنبيه هام إيه نيتك في هذا العمل خلي نيتك خالصه لله، ولا تبخل على أحد بمساعدة أو نصيحة، كمان أعلم أن التوفيق بيد الله فلا تنشغل بذلك عن طاعته وألح عليه سبحانه بالكثير من الدعاء والبكاء…..

واحد يقولي بس إنت مش كلمتنا عن تطبيق الفكرة، وإزاي هنطبقها، أقوم أقول له يا راجل بقى ده كلام، إنت عندها ستكون مؤهل وعارف طريقك كويس وكويس جداً بس نصيحتي الوحيدة لك هنا دون كل ملاحظاتك من أول لحظة ورتبها، آخر سؤال هجاوب عليه وهيكون هوه خاتمة مقالة اليوم، لو كل ما أعمل شيء ألاقي من سبقني إليه، أو الفكرة لم تنجح عند التطبيق شيء وارد، أعمل إيه ساعتها وقد ضاعت من عمري 5 سنوات، طبعاً ده كلام يزعل ضاع إيه يا راجل ده إنت بقيت مرجع في هذا الفن وأكيد زمانك حصلت على شغلانه بنت فظيعة ههههه، وبقى إسمك معروف في الشركات لأنك فاهم، ولكن على العموم هقولك على فكرة من ذهب، وهي أقل شيء صدقني هتخرج بيه من الموضوع ده، إنك هتألف كتاب هيكون لا مثيل له في ذلك الفن، أكتب فيه قبل ما تتكلم عن هذا العلم أكتب فيه قصتك مع هذا العلم، وكيف أحببته حتى العشق، لتكون نموذجاً يقتدي به الشباب…..

ملحوظة: الموضوع يحتاج للقراءة أكثر من مرة وبتركيز، ده مستقبلك مش مجرد موضوع عادي بتقرأه…

وفقكم الله يا شباب الأمة لصناعة مجداً قد أضعناه
وسامحوني على الكتابة بالعامية المصرية وعلى الأخطاء الإملائية وأبقوا نبهوني لها لكني أكتب وأنا مرهق ومريض، أعمل إيه بس علشان بحبكم،،،
فلا تنسوني من صالح دعائكم

أخوكم م/ عادل الحميدي

 

حوار عن المقابلة الشخصية

السلام عليكم ورحمه الله وبركاته:

حوار دار بين المهندس عادل واخونا Mohamed Gamal كان عن :-

– كيف تجتاز المقابلة الشخصية ؟
– اسباب فشل أجتياز المقابلة الشخصية ؟
– اسباب اجتياز المقابلة الشخصية ؟
– ستدور المقابلة الشخصية حول 4 نقاط :

المهندس عادل طلب من اخونا محمد انه يلخص المحادثه وننشرها لتعم الفائده , بصراحه الملف جميل جدا ومرتب :

حوار عن المقابلة الشخصية

 

IPv6 By Eng. Adel Al-Hamedi

السلام عليكم
ملف الباور بوينت اللي بشرح منه حلقات الـ
IPv6

IPv6 By Eng. Adel Al-Hamedi

 

Internet of Things Trends To Watch In 2014

السلام عليكم

ناس كثيرة بتسألني عن مواضيع لأبحاث علمية ورسائل ماجستير ومشاريع تخرج ووو وإليكم إجابتي لعام 2014…

الملف المرفق عبارة عن لافتة على جانب الطريق، وسيساعدك بما فيه بإذن الله على الوصول لضالتك،،،

ففي الملف معلومات موجزة عن أحدث وآخر الإتجاهات التقنية المتعلقة بإنترنت الأشياء
Internet of Things IoT
والذي يعتبر موضوع الساعة !

ففي الملف قائمة تضم أكثر من 100 موضوع له علاقة بـ IoT وكلها مواضيع شيقة ومثيرة وحديثة

هذا بالإضافة إلى روابط ذات أهمية كبيرة لكل ما قد يستهويك من تلك المواضيع وستساعدك جداً

والمطلوب من سعادتك أن تختار أحد تلك المواضيع وتعيش حياتك بقى زي ما تكلمنا قبل كده عن إزاي تسير في بحث علمي أو رسالة ماجستير أو مشروع تخرج

وبالتوفيق

دعواتكم

أخوكم م/ عادل الحميدي

Internet of Things Trends To Watch In 2014